(1910) ¡El degorrio de los tomóviles!
Pepa: Xuaca, el mundo tá perdíu; á los probes ya non nos dexen ni alendar.
Xuaca: Tienes razón, né. Toos son escontra nuestra: l'Auntamentu, el Gobiernu, hasta los tomóviles.
Pepa: ¡Los tomóviles! ¡Mal ratu los fienda!
Xuaca: Matánonme ayer una pitina pinta que valía nel Fontán un duru com'un cuartu.
Pepa: Pos ten pacencia, né, que cuando escomiencen á facer estropicios non dan abastu. A mí estrapallánonme fai tres meses un gochu teberganu que yera gloria vélu. Comía com'un sallador... ¡Y entoavía reínse como llocos los condergaos que diben adientro del tomóvil!... ¡Punxénonme una sangre!...
Xuaca: ¡Mal diaño me lleve si non tán fechos unos xudíos!
Pepa: Pos el tomóvil que fizo el amagüestu yera el del Marqués. Conocílo en que toos llevaben caretes...
Xuaca: Non me digas más, né; ¿entós ye unu que siempre va á la carrera?
Pepa: El mesmu; pega ca resoplíu que mete mieo. ¡Así Dios me salve si non ye verdá! Hasta los mios neños s'espanten d'oyélu. El mío Pepín teníalu mamando l'otru día pe la nuiche, y al gufar unu nel camín, arrebalgóseme so el catre y desfízome el xergón del sustu.
Entoavía tá la fueya nel suelu.
Xuaca: ¡Ya t'ainde el degorrio!...
Pepa: Pos un cantazu va lleválu nel alma.
Xuaca: Ay, né, non t'enrites; ye meyor facése la boba.
Pepa: ¡Miálma, si non me daben entenciones!...
Xuaca: Táte quieta, Pepa. Con un tomóvil non hay que gastar chancies; son muy delicaos...
Pepa: ¡Non me lo digas, muyer, que non te lo creo! ¿Non tienen juerza pa matános la hacienda?... ¿Pos entós?...
Xuaca: Tienes razón, Pepa; pero tamién ye verdá lo que te cunto. El mío home, que ye algo entendíu n'estes custiones, porque trabayó de peón n'un garajo d'esos onde diz qu'incierren los tomóviles, díxome qu'estos degorrios tienen too l'intruyenzo nos tubiquinos de llatón que lleven debaxo les banquetes. Lo que más me atorolló, Pepa del alma, ye lo que me dixo el mío Pinón, de qu'el caray de los tobiquinos son les venes del tomóvil, y que la sangre d'elles ye una cosa espesa como cuayá y fedionda como cag... de gochu amorriñau, que i llamen la guasalina...
Pepa: ¿La qué, muyer?...
Xuaca: La guasalina, né.
Pepa: Páme que la guasalina ye la que gasta el to home.
Xuaca: Non, muyer, llámenla asina.
Pepa: ¡Nunca tal oí!...
Xuaca: ¡Pos Dios me quite la gloria si non ye verdá! Non ves tú, muyer, que al mío home dai por deprender ahora en eso que i llamen la Dextensión de la Universidá d'Uvieo, y fízose muy lleíu. L'otru día vieno pa casa con un llibriquín que díxome emprentáralu un Catadráticu, que i llmane... ¿cómo i llamen, señor?... Ye un apellíu de munchu ruidu... Páme que i llamen Bulla. Güeno; díxome qu'esi llibriquín traí munches coses de conomía, y d'entós p'acá, atruéname los oíos á ca menutu: "Xuaca p'aquí, Xuaca p'allá. Tú yes una pollina roxa, muyer; non entiendes d'estes coses." Y dízme que nesta custión de conomíes, tá el remediu de les llaceries del mundo, y qu'esto ye'l quiz de la clematericación del engrase del endividuo... A veces pame que de tanto deprender van saltasei los seso del celebro...
Pepa: Non pos el mió home non ye bobu del too; ¡como que deprendió cuentes na escuela de Xiblagalgos!; pero non i consiento que me llame pollina roxa ni pollina amariella. ¡Taría guapo que veniés con conomíes á una muyer con cuatro fíos y diez riales de xornal!...
Xuaca: El míu, muyer, como deprender, algo deprende, sólo que non i sirve pa ná. Los llibros traen más mentires qu'un cortexu de dos vieyos. Cuando el tomó, vil fizo el Samartín del mió gochu, viénome con el llibrín de les conomíes: Xuaca, tá el daño fechu, pos en xamás vió dengún de los nacíos arresucitar un gochu defuntu; pero ahora vién lo de les pensaciones...
Pepa: ¿Y qué ye eso?...
Xuaca: Díxome que yera custión de quilibriu.
Pepa: Tá llou; entós ¿diba llevar el gochu dimpués de muertu á facer payasaes nel circo?
Xuaca: Non, muyer, non ye eso. Lo de les pensaciones explicóme que yera un quilibriu que teníamos que facer pa non dar con el c... na ceniza; que si el gochu valía venti duros antes de la disgracia, dimpués, debíen valer les morcielles, el tocín y l'utro, venticinco. Pero, á mí, que naide me vién con conomíes, paecióme de poca caridá que ficiesen el gastu otros probes como semos nosotros, que non tienen tomóvil, y díxeilo... ¡qué caray!
Pepa: ¿Y qué te dixo él?
Xuaca: En un emprencipiu, ná, non fizo más que arremellar los güeyos. Lluegos díxome que yera cierto lo que yo i decía, pero qu'el diba á facer entós una vengancia con el tomóvil.
Pepa: ¿Y fízola, muyer?
Xuaca: ¡Qué diba á facer! Metiósei na cabeza semar de tachueles el camín pa qu'estallasen los numáticos del tomóvil; pero yo non i dexé, por mor de que fuesen á pagar xustos por pecaores y se amoláse dalgún probitín d'esos que anden descalzos pel mundo.
Pepa: Ficiste bien, né. En pollín flacu toes son mataúres, y esto mesmo ye lo que nos pasa á los probes. ¡Ay, probes de los probes! Non podemos nin falar escontra los condergáos tomóviles. Na más tien una un descuidu d'un menutu, ya tan les fabes pegaes n'el c... de la pota. Y lluego, l'home ponse fechu un cuélebre talmente. ¡Y qu'entoavía tengan dalgunos babayos ganes d'empapiellanos con conomíes! Los llibros y les conomíes son pa los ricos, Xuaca...
Xuaca: Ye verdá, né. Nos llibros deprenden los ricos les picardíes que nos facen, y les conomíes sáquenles del nuestro bolsu. Porque les faltriqueres de los probes tan más arrugáes que una mayuca, y ye por eso por lo que diz el refrán: "Bolsa en sin dineru, llámoi yo pelleyu." ¡Na, na, pepa, la culpa ye del Auntamentu, del Gobiernu, de los tomóviles, y casi estoy por xurar que de les conomíes del caray que traen amoriau al mio home!...